2019 жылдың 17 шілдесінде Ақордада Қазақстан Республикасының Президенті Білім және ғылым министрі Асхат Аймағамбетовті қабылдады. Бұл туралы Мемлекет басшысы өзінің Твиттер желісіндегі парақшасында хабарлады. Қасым-Жомарт Тоқаев министрге ұлттық университеттердің ректорларын конкурстық негізде Қазақстан Республикасы Үкіметінің қаулыларымен тағайындау туралы нормативтік құжаттар дайындауды тапсырды. 

Кездесу барысында Қасым-Жомарт Тоқаевқа сондай-ақ, министрліктің қазіргі жұмыстары, негізгі бағдарламалық құжаттардың жүзеге асырылуы, сондай-ақ, берілген тапсырмалардың орындалуы жөнінде мәлімет беріліп, Асхат Аймағамбетов білім саласын дамытудың 2020-2025 жылдарға арналған мемлекеттік бағдарламасының әзірлену барысы туралы баяндады. Қазақстан Президенті жаңа мемлекеттік бағдарламаның мазмұны мен осы құжатта шешілуге тиісті міндеттер жөнінде өз ұсыныстарын айтты.

Ақпарат көздері:  www.edu.gov.kz